«ایگور لیاکین فرولوف» سفیر روسیه در تاجیکستان امروز (دوشنبه 6 جدی) گفت که کشورش به دنبال مدرن سازی قرارگاه 201 ارتش روسیه مستقر در تاجیکستان می باشد و در همین راستا، کار ساخت یک پایگاه نظامی در امتداد مرز تاجیکستان و افغانستان آغاز کرده است.
فرولوف امروز در نشستی مطبوعاتی به خبرنگار تاس گفت که روسیه کار ساخت این پایگاه نظامی را در خاک تاجیکستان و در امتداد مرز با افغانستان آغاز کرده است.
وی گفت: «مسئله امنیت و بخصوص موضوع افزایش تدابیر امنیتی در مرز تاجیکستان – افغانستان در نشست های دو جانبه و چند جانبه روسیه با تاجیکستان و دیگر اعضای پیمان امنیت جمعی مطرح شده است.»
او افزود که این پایگاه نظامی در ولسوالی «شمس الدین شاهین» در ولایت ختلان تاجیکستان و در امتداد مرز با افغانستان ساخته خواهد شد.
سفیر روسیه اضافه کرد که بودجه ساخت این پایگاه تامین شده، توافقنامه آن نیز میان روسیه و تاجیکستان به امضا رسیده و کار عملی آن نیز آغاز شده است.
وی همچنین خاطرنشان کرد که روسیه در راستای همین توافق برخی تسلیحات نظامی نیز در اختیار ارتش تاجیکستان قرار داده است.